В благодарность за труд: о бывшем водителе автобуса, который возил детей из сел в шебалинский интернат, Ахмеде Николаевиче Коружекове – пишет Екатерина Чаркаевна Балушкина.
Шабалинниҥ орто ÿредÿлÿ школыныҥ интернадыныҥ тÿÿкизин бичип тура, Коружеков Ахмед Николаевичтиҥ ады-jолын бичибес аргам jок.
Ахмед Николаевич 40 jылдаҥ ажыра «Новый путь» совхозто, Jаан-Чаргыныҥ баштамы, Шабалинниҥ орто ÿредÿлÿ школында тискинчизи болуп иштеген. Мынча кире öйдиҥ туркунына ол тискинчиниҥ jеҥил эмес ижиниҥ уур-кÿчтерин кöргöн. Ол 2003 jылдаҥ 2015 jылга jетире Jаан-Чаргыдаҥ, Чичке-Чаргыдаҥ, Арбайтыныҥ школдыҥ балдарын бир де неделя тутагы jогынаҥ öйи-öйинде Шабалиниҥ интернадына тарткан Jаҥы «ГАЗ-66» таҥмалу автобус-вахтовикке отурып, тискинчиниҥ ижин каруулу бÿдÿрген. Боочы-Боомду jерлерди öткöндö, кöликтер ÿрелип те jат, jе бу кижини кöлике чебер болгонына, оныҥ темир-терсиниҥ «оорузын» jакшы билерине автобус узаак öйлöргö балдарды тарткан эди. Кезик туштарда Шабалинеҥ школдыҥ балдарыла кожо студенттерди де отургызып, айылына экелип, ойто кайра ары-бери тарткан болгон. Jерлештери, jаандаган да балдар бÿгÿн де бу кижиге быйанду jÿргÿлейт.
Jерлештериниҥ, нöкрöлöриниҥ, кöрÿш-таныштарныҥ айтканы ла, Ахмед Николаевич кööркöмjи jогынаҥ ижин сÿÿген, сÿреҥкей иштеҥкей кижи. Ол канча jылдарга акту-чектÿ ижин бÿдÿрип, jаҥыс ла тöрöл совхозыныҥ магын кöдÿрген эмес, анайда ок Шабалин аймагыныҥ, бÿткÿл республиканыҥ öрöги öзÿмине jаан камаанын jетирген. Бу кижи бойыныҥ jозокту ижи ле интерната jаткан балдардыҥ келер jÿрÿмине jаан jол берген дезе jастыра болбос. 1990 jылдарда интернатта jадып ÿренген балдардыҥ алдынаҥ интернаттыҥ ишмекчилериниҥ алдынаҥ, балдардыҥ эне-адазыныҥ алдынаҥ слерге jабыс бажысты эҥчейедис.
Бÿгÿнги кÿнде Ахмед Николаевич калада jуртайт. Эш-нöкöри Анастасия Сергеевна ла тöртöн jылдаҥ ажыра эптÿ - jöптÿ jуртап, эки бала азырап чыдаткан. Ол ырысту ада, таада. Эмди баркылары Данил, Эльвира, Санат, Суркун интерната jадып ÿренип чыдап jат. Абакайы Анастасия Сергеевна öбöгöниниҥ ижине jаан болушты jетиргенле. Балдар jÿрÿмде бойыныҥ jерин, ижин тапкылаганына öрöкöндöр салымына быйанду.
Бу jыл кочкор айда эш-нöкöри Анастасия Сергеевна jаан оорудаҥ улам jада калды. Бис Ахмед Николаевичке, балдарына олорло кожо карыкканысты jетиредис.
Ахмед Николаевич эзен-амыр отурарда, jылу, быйанду сöстöристи газет ажыра айдып саларга санандыс.
Шабалиниҥ орто ÿредÿлÿ школыныҥ интернадыныҥ воспитатели Балушкина Екатерина Чаркаевна
